Редефинирање на туристичките доктрини и стратегија со нови приоди во туристичката понуда со заштита на здравјето и безбедноста на туристите

21.05.2020

Третата тема од серијалот Корона дијалози „Влијанието на новите предизвици од пандемијата врз туризмот и угостителството“ беше посветена на последиците од пандемијата и ударот што го доживеаа економските активности особено секторите туризам и  угостителството. Во отворена и плодна дискусија покрај главните говорници, во Дијалогот се вклучија професори, туристички работници и студенти од ФТУ кои изразија подготвеност волонтерски да учествуваат во рестартирањето на овој значаен сектор.

Ректорот на УКЛО, Сашо Коруновски  посочи дека главните прашања со кои ќе се соочиме многу брзо, најдоцна во наредните месеци, се однесуваат на градење нови стратегии за одговор на кризата во туризмот, особено во дестинацискиот, со акцет на менаџмент стратегиите што треба да изградат отпорност, но и прилагодливост на промените.

Осврнувајќи се кон најновите владини мерки, министерот Крешник Бектеши оценува дека тие се интервентни, со намера да ја поттикнат приватната потрошувачка, но истовремено, да се влијае и на менување на навиките на граѓаните во насока на  што поголема посета на  домашните туристички дестинации со што се помага во намалување на негативните ефекти. Тој нагласи дека Министерството е отворено за сугестии, коментари и идеи се со цел да се создава подобра стратегија: во делот на домашниот туризам, начините на привлекување што повеќе странски туристи, особено од Регионот.

Деканот на ФТУ, Цветко Андреески илустративно се осврна кон два аспекта: местото на туризмот во државата и причините за ударот од пандемијата врз оваа стопанска гранка и препорача посеопфатни мерки, имајќи предвид дека туризмот со околу три проценти учествува во БДП, има над триесет илјади директно вработени лица и особено затоа што неговиот развој е мултипликативен.

Говорејќи за меѓународниот туризам, професорката Иванка Нестороска ги нагласи последиците од пандемијата врз опаѓањето на обемот на меѓународните туристички патувања, приходите и работните места. Во услови кога вирусот го „заклучи целиот свет“,  најновите истражувања на Светската туристичка организација  покажуваат дека буквално сите светски дестинации имаат ограничувања за патување, а 72 проценти целосно ги затвориле своите граници. Според неа, Ковид -19 е предизвик со кој мора да се соочиме сите заедно, бидејќи туризмот  покрај директното и индиректно креирање работни места, е значаен заради мултидисциплинарниот карактер.

Од самиот почеток на кризата хотелската Асоцијација - Хотам е вклучена во заложбите за заедничко делување, истакна Крис Блажески. Поставена е како „ сврзно ткиво“ меѓу чинителите во туристичкиот сектор и државата. Асоцијацијата го промовира ставот за координираност, бидејќи се очекува  слаба сезоната и, ако постои  надеж дека набргу ќе почнат да се отвораат сместувачките капацитети, хотелите и рестораните, покрај брзи решенија, заради неизвесноста со пандемијата, препорачуваат и долгорочни планови за излез од кризата.

Андреј Сирачевски од Аурора Турс, оценува дека економските мерки за финансиска помош кои ги донесе државата се добредојдени, но, краткорочно го олеснуваат шокот и штетите, потребно е нивно дополнување. Вредносните ваучери ќе го стимулираат домашниот туризам, но неопходни се длабински анализи, голем ангажман и суштински консултации со професионалците, за да се обезбедат подобри ресурси и инфраструктура за развој на оваа значајна гранка. Треба да се размислува и за намалување на стапката на ДДВ во угостителските објекти, затоа што туризмот е единствена гранка на која се пресметува ДДВ при извоз.

Професорот Науме Мариноски ги образложи причините поради кои туризмот како комплексна појава е меѓу најпогодените од кризата. Тој се осврна и кон визијата за неопходна, нова туристичка доктрина, при што инфраструктурната опременост, комуналната уреденост и хигиената ќе бидат во прв план, а основа за новиот стратегиски приод во третманот на чувствителноста на туризмот ќе биде максимата: Туризмот како лек.

Резимирајќи го дијалогот, модераторот, проф.д-р Марјан Ѓуровски од Факултетот за безбедност-Скопје истакна  дека во угостителско - туристичкиот сектор покрај применливи решенија на краток рок, неопходно е редефинирање на јавните политики и доктрини за туризам, со поголема вклученост на едуциран, академски кадар и искусни лица од секторот. Односно, нова стратегија со нови приоди во туристичката понуда и промоција на земјата, при што највисоки приоритети се безбедноста и здравјето на граѓаните и довербата, пришто процесот на нормализација е нужен и заради опасноста од загрозување на економската безбедност.

Најновите Корона дијалози  се одржаа во соработка со Факултетот за туризам и угостителство од Охрид. Иницијатор и водител на Корона онлајн дијалозите е проректорот, проф. д-р Марјан Ѓуровски.Ссеријалот, со нова, атрактивна тема,  продолжува наредната среда.


Scroll to Top